Half-rice ordinance aprub na

CEBU, Philippines – Giaprubahan na sa Cebu City Council ang Rice Conservation Ordinance nga nagmando sa tanang kan-anan sa siyudad nga iapil sa ilang menu ang half-rice o tunga lang nga kan-on.

Ang pagpasar sa ordinansa natunong usab sa National Rice Awareness Month karong bulan sa Nobiyembre subay sa Proclamation No. 524.

Ang ordinansa nga gisuwat nila ni Councilors Mary Ann delos Santos ug Nendell Hanz Abella magsilot niadtong mga kan-anan pinaagi sa pagpamulta o ba kaha pagkanselar sa ilang business permits. Sa unang kalapasan dunay multa nga P1,500, sa ikaduha P3,000, sa ikatulo P4,000, ikaupat  P5,000  ug sa ikalimang kalapasan suspension sa business permit hangtud nga  di sila musanong sa ordinansa.

Ang tanang kan-anan gihatagan og tulo ka buwan aron mosunod sa maong ordinansa. Ang mga kan-anan naglakip sa  kantina sa mga kompanya, restaurants, eskuylahan, hospitals, cafeteria, catering operations, fast-food chains ug uban pang matang sa negosyo nga naglambigit og pagkaon gawas lamang sa mga “eat all you can” nga mga kan-anan.

Kinahanglang nakabutang g’yud sa menu nga dunay half-rice ug pahibaw-on g’yud kanunay sa service crew, waiter, waitress o kahera ang kustomer sa dili pa sila mo-order, kini kabahin gihapon sa kampanya nga dili mag-usik-usik og bugas.

Sumala pa sa Food and Nutrition Research Institutes, ang duha ka kutsarang kan-on kada pangaon ang usikan sa matag Filipino. Niadtong 2010, 13 porsiyento sa total rice imports nianang tuiga nga mikabat og P6.2 bilyones ang nausik o napunta sa lamawan.

Kini mahimo pa untang makaon sa 2.6 milyones ka Filipino nga gipanggutom nianang tuiga. (Edwin Ian Melecio gikan sa The Freeman) (BANAT NEWS)