BFAR: Kinhason sa Cordova di makahilo

CEBU, Philippines - Giklaro sa Bureau of Fisheries and Aquatic Resources-7 nga wala’y angay ikabalaka ang mga molupyo sa lungsod sa Cordova kalabot sa mga kinhason sa ilang lugar.

Matud ni BFAR-7 Assistant Regional Director, Dr. Allan Poquita, nga dili taas ang toxicity level sa mga kinhason sukwahi sa report sa University of the Philippines-Visayas.

Ang pamahayag ni Poquita gidasonan sa chemist sa BFAR-7, Luzviminda Bato, kinsa miingon nga ang nakuha nga specimen sa UPV nasuta nga taas pa kaysa standard sa European Regulation.

Hinuon giangkon ni Poquita nga wala sila’y standard regulation apan iyang gipasabot nga ang kemikal nga makadaut mas taas pa sa makuha sa sinugbang pagkaon sama sa barbecue nga wala pusta og dahon o foil.

Usa sa kamatuoran nga gipasikaran ni Poquita dili kuyaw kan-on ang bisan unsa’ng kinhason sa Cordova mao nga wala’y gikataho nga nahilo o nasakit sukad pa sa niaging tuig.

Usa ka team sa UP-Visayas ang nihimo og pagtuon labot sa epekto sa nikatap nga lana gikan sa nalunod nga MV St. Thomas Aquinas sa kadagatan sa Cordova lakip na gani sa bakhawan ug mga mananap sa kadagatan.

Ang sample nga ilang gitun-an gikuha niadto pa’ng buwan sa Abril 2014. (BANAT NEWS)