Duha naghikog, usa nagpusil sa ulo

CEBU, Philippines - Usa ka amahan ang nagpusil sa iyang kaugalingon samtang laing usa usab ang naghikog diha sa dakbayan sa Lapu-Lapu.

Sa Barangay Pajo, usa ka Romeo Mula, 59, nga taga Sitio Kamanggahan ang nakit-ang patay ug gituohang nagpusil sa iyang ulo.

Matud ni Senior Police Officer 1 Allan Pantaleon sa Homicide section ang anak ni Mula nga si Christopher miingon nga nakuratan sila sa buto sa armas ug sa pagsusi nakit-an na lang nga nagbuy-od si Mula nga may samad pinusilan sa agtang.

Naggunit pa kini sa usa ka.38 caliber rebolber nga adunay silencer nga naka-attach sa pusil.  Patay na kini paghiling sa mga sakop sa Emergency Response Unit Foundation (ERUF).

Matud pa sa anak pirme nang nanamilit kanila ang amahan ug gimandoan sila nga ipaatiman gyud ang ilang inahan, sumala pang Pantaleon daw dunay depression ang maong amahan. Sa laing insidente sa paghikog, usa ka lalaki ang naabtan nga wala nay kinabuhi sulod sa iyahang balay sa Mactan Benito Ebuen Air Base. Ang maong lalaki giila nga si Niño Jaculbe, 33, lumad nga taga Aquino, Kanlaon City, Negros Oriental.

Nagkanayon ang igsoon niini nga si Jerome ngadto sa kapolisan nga hubog ug adunay problema ang igsuon tungod kay gibiyan kini sa kapuyo.

Nakurat na lang si Jerome nga nagbitay na kini sulod sa iyahang balay  gamit ang usa ka cable  wire hinungdan nga nangayo siya og tabang sa mga sakop sa Philippine Air Force apan patay na gyud kini.  (BANAT NEWS)