Ilegal nga mananagat sikop sa Compostela
CEBU, Philippines - Sikop ang duha ka mananagat sa lungsod sa Compostela human naaktohan sa Municipal Fish Warden ug kapolisan sa gihimo nila nga seaborn patrol niadtong Sabado sa udto.
Ang mga nasikop naila nga sila si Manolito Gidayawan, 34, ug Rafael Mahusay, 42, pulos minyo nga taga San Isidro, San Francisco, Camotes.
Ang Municipal Fish Warden sa maong lungsod nga si Mardinito Dingal kauban ang iyang mga kauban ug ang sakop sa Compostela Police nga si PO2 Emil Rubilla ang nakasakop sa duha ka mananagat nga mihimo sa pagpanagat nga “toktok.”
Nakuha gikan sa mga mananagat ang 30 metros nga pukot, usa ka banyera nga 15 kilos nga isda, usa ka pumpboat ug makina niini nga K410.
Matud ni PO3 Michael Magallon sa Compostela Police nga hayan makagawas ra karong adlawa ang duha ka dinakpan kung sila makamulta sa ilang paglapas sa Municipal Ordinance sa maong lungsod. (BANAT NEWS)
- Latest
