Dakung pusher sa Lacion sikop

CEBU, Philippines - Mokabat sa P150 mil ang balor sa drugas nga nakuha sa kapolisan sa duha ka operasyon ang gihimo sa lungsod sa Consolacion ug dakbayan sa Naga diin tulo ka tawo ang nasikop.

Sa lungsod sa Consolacion, sikop ang usa ka 45-anyos nga lalaki nga gituohang tigpayuhot og drugas sa Upper Tugbongan, Purok I.

Nangulo sa operasyon si Senior Inspector Franco Oriol hinungdan sa pagkasikop ni Apolo Pacifico Vidal, 45.

Nasakmit sa dinakpan ang usa ka dakung paketeng shabu nga nagkantidad og P141 mil; P4,000 nga salapi nga gituohang halin, duha ka cellphone, mga tally sheets sa masiao, mga tip sheets ug usa ka video karera machine.

Samtang sa dakbayan sa Naga, duha ka lalaki ang nasikop ug nakuhaan og drugas ug armas sa barangay Balirong.

Ang mga nasikop naila nga sila si Ruel Canonigo, 38, nagpuyo sa maong lugar ug Eric Requinto, 24, taga barangay Tagjaguimit.

Nakuha sa kapolisan gikan kang Canonigo ang duha ka medium size nga putos sa drugas, lima ka gagmay’ng pakete, duha ka timbangan ug drug paraphernalia.

Samtang nakuha gikan sa posesyon ni Requinto ang .38 revolver nga dunay tulo ka bala ug mga drug paraphernalia.

Tukmang kaso ang ipasaka batok sa mga dinakpan. (BANAT NEWS)