Tungod sa manok igtatari nadunggaban
CEBU, Philippines - Gidunggab sa iyang amigo ang usa ka lalaki kinsa nanghilabot sa manok nga igtatari sa sitio Lupa, Soong I, Mactan, dakbayan sa Lapu-Lapu.
Ang biktima nailhan nga si Diandy Flores, 26, samtang ang suspek mao si Enan Impas, parehong nagpuyo sa maong lugar.
Si Flores, utility worker sa First Glory, Mactan Economic Processing Zone (MEPZ) I.
Matud sa imbestigasyon ni PO3 Lydo Pinos sa Lapu-Lapu City Police Office homicide section nga nahitabo ang pagpanunggab alas 4:30 sa kadlawon niadtong Huwebes.
Si Flores niabot sa iyang balay kuyog sa iyang asawa dihang niabot usab si Impas nga niduol ug nananghid kung pwede ba magunitan ang manok pangsabong.
Si Flores nagdumili basin sakitan ang manok apan si Impas namugos nga gunitan ang manok hinungdan nga kini nilupad.
Gipatiran ni Impas ang manok nga maoy nakapasuko ni Flores. Sa wala’y klarong rason, gidunggab ni Impas si Flores gamit ang usa ka mahait nga hinagiban.
Daling nisibat ang suspek samtang ang biktima gidala sa Lapu-Lapu City District Hospital. (BANAT NEWS)
- Latest
