Kawani sa Toledo City Hall patyon unta

CEBU, Philippines - Kritikal ang kahimtang sa usa ka job order worker sa Toledo City government human gipauwanan og bala sa tulo ka wala mailhi nga lalaki didto sa Sitio Luray 1, Poblacion, Toledo kaniadto’ng Biyernes sa gabii.

Ang biktima giila nga si Jerome Gaea, 42, taga Barangay Sangi, dakbayan sa Toledo ug nahiagom og pinusilan sa iyang tuo nga bahin sa likod nga abaga ug ang bala milapos sa iyang tuo nga dughan.

Sa imbestigasyon ni SPO3 Basiliso Balicoco nahibaw-an nga pasado alas 10 sa miaging gabii padulong pa unta motrabaho ang biktima isip tigbantay sa public plaza sa Toledo City.

Matud ni Balicoco nga ang biktima nagsakay og trisikad gikan sa terminal sa dakbayan sa Toledo diha nga may tulo ka lalaki nga nagsakay og motor ug kalit lang mipusil kaniya.

Apan wa apila pagpusil sa tulo ka tawo ang drayber sa trisikad nga gisakyan sa biktima. Miingon ang polis nga bisan pa man og samdan ang biktima nakadagan gihapon kini ug nangayo’g tabang sa kapolisan.

Samtang ang mga armado’ng tawo dali nga mipabulhot sa ilang motor palayo sa lugar. Pag-abot sa kapolisan didto sa crime scene nakarekober sila og upat ka kabhang sa kalibre .45 nga bala. Gisusi pa sa kapolisan kon unsay motibo sa maong pagpamusil sanglit wala may nakaila sa mga tawo nga mipusil sa biktima.  (BANAT NEWS)