2 ka Danish gilabnihan
CEBU, Philippines- Gilabni sa duha ka lalaking nagsakay og motorsiklo ang bag sa duha ka Danish samtang naglakaw sa dalan sa may Cabancalan, Talamban, dakbayan sa Sugbo niadtong Sabado sa gabii. Ang mga biktima naila nga sila si Lars Vinther, 34, ulitawo ug Amanda Graversen, 27, dalaga nga parehong nagpuyo sa Doña Rita Village, Banilad, sa maong dakbayan.
Matud sa mga biktima nga samtang sila naglakaw kalit lang usa ka motorsiklo ang mihunong sa ilang likod ug dayon labni sa dala nilang bag.
Nakuha sa manglabnihay ang mga personal nga gamit sa mga langyaw nga naglakip sa laptop, mahalong relo, mga gadgets, sapatos ug senina sa wala pa matino nga kantidad.
Matud ni Sr. Insp. Bienvenido Miral, hepe sa Talamban Police Station, nga nahinabi sa Banat News nga mao usab kini karon ang labad sa ulo sa kapolisan ang magsakay og motorsiklo nga mohimo og pagpanulis ug pagpanglabni.
Sumala pa ni Miral nga sa nakuha nilang impormasyon dili taga Sugbo ang mga suspek ug diha lang kini mangita og tayming sa mga pwede nilang biktimahon gumikan sa kadaghang pwedeng kalutsan kung sila mosibat.
"Mag-roving pud ni sila, mangita og tayming kinsa’y mabiktima, pulis ra gyud ang bantayan ani nila," matud ni Miral.
Usa sa mga plano karon sa hepe sa kapolisan sa maong buhatan nga mas pahugtan pa nila ang paghimo og random checkpoint sa managlahing bahin sa maong lugar aron pagsikop sa mga responsable. - /GMR) (BANAT NEWS)
- Latest
