Padung magsuyop sikop

CEBU, Philippines - Wala makadayon pagsuyop og shabu ang duha ka lalaki human dakpa sa kapolisan sa barangay Poblacion, dakbayan sa Danao niadtong Martes sa gabii.

Giila ni PO2 Ronald Gomez ang mga nadakpan mao sila si Van John Taneo, 18, ug Jose Rey Alpar, 25, pulos walay trabaho ug nagpuyo sa maong dapit.

Sila si PO3 Fiel Restauro, PO2 Thomas Redon ug PO1 Rene Cotamora II maoy nakasigpat sa duha nga daw gikuyawan sa ilang paghidangat sa maong dapit.

Girikisa ang bulsa sa mga suspetsado ug maoy nakuha gikan kang Taneo ang pito ka paketeng shabu ug duha ka disposable lighters, duha ka tinfoil ug nakuha usab kang Alpar ang lima ka pakete ug disposable lighter.

Matud pa ni Gomez nga nagpatrolya sila si Restauro sa palibot sa dakbayan sa Danao isip kabahin sa ilang operasyon sa matag gabii.

Kasong kalapasan sa paghupot sa ilegal nga drugas ang ilang ipasaka batok sa duha ka dinakpan nga nagtingkagol na karon  sulod sa selda sa ilang detention cell. (Romeo T.  Limpangog/GMR)

Nahinanok gikawatan

Mokabat sa P24 mil ang balor sa mga butang nga nakawat sa wala pa mailhing kawatan samtang maayong pagkahinanok sa tag-iya sa sitio Ipil-Ipil, Baring, lungsod sa Carmen.

Ang biktima sa pagpanglungkab nailhan nga si Lourdes Lumen, 50.

Matud ni PO2 Jerome Quimque sa Carmen Police Station nga nahinabi sa Banat News nga alas 8 na sa buntag sa nakalabay nga adlaw nadiskobrehan ni Lumen nga gisaka og tawo ang iyang balay pinaagi sa pagtangtang sa jalousie blades sa likod nga bintana.

Nakuha sa kawatan ang P24 mil nga kwarta ug tulo ka cellphones.

Matud ni PO2 Quimque nga dili kini ang unang nahitabo sa ilang lugar nga dunay mga balay nga gisulod sa kawatan nga wala gyud nakabantay ang tag-balay kinsa mga bata ang suspek sa kapulisan.

Dili pa hinoon ma-determinar sa kapulisan kung mao ra bang grupoha ang mibiktima sa maong balay ug tayming-tayming lang ang paghimo sa maong krimen. (BANAT NEWS)