Jao-2014-01 gihulagway nga pangwarta lang – Piston

CEBU, Philippines - Mahinayon gyud ang transport strike karong Hulyo 21 ug Hulyo 22 bisan pa man sa hangyo sa mga opisyal sa dakbayan sa Sugbo atol sa public hearing kagahapon.

Ang Land Transportation Franchising and Regulatory Board -7 pinaagi ni Reynaldo Elnar, ang ilang Transportation Development Officer inabagan sa City Traffic Office Management (CITOM) ug Land Transportation Office (LTO)-7 mohangyo sa mga bus companies nga mobiyahe gawas sa ilang rota.

Special permits

Matud pa ni Elnar nga dunay 14 ka mga bus  sa Vallacar Transit (Ceres) ang misanong sa ilang hangyo nga mibiyahe gikan sa Bulacao paingon sa Talamban ug gikan sa siyudad sa Lapu-Lapu agi sa North Bus Terminal paingon sa Fuente Osmeña. Gibana-bana nga 20 porsiyento sa transportasyon ang naapektahan kagahapon tungod sa pagtambong sa mga drivers sa public hearing may labot sa Joint Administrative Order (JAO) sa LTO, LTFRB ug Department of Transportation and Communications.

Pangwarta

Ang tigpamaba sa grupong Pagkakaisa ng mga Samahan ng Tsuper at Opereytor Nationwide (PISTON) nga si Greg Perez miingon nga pangwarta ug dili pangdisiplina ang JAO-2014-01.

Iyang gidugang nga bug-at na kaayo alang kanila ang multahan tungod kay ugaling madakpan usab sila sa CITOM laing multahan na sad ang ilang atubangon pina-agi sa City Ordinance 2007.

Iya usab gitataw nga daghan na kaayong mga draybers ang nag-atubang og patungpatong nga multahan nga mas dako pa sa kita sa mga yanong mga draybers ug operators.

Nagpatabang

Giawhag ni Perez nga magbuhat og resolusyon ang konseho sa Cebu City aron mahunong ang pagpatuman aning DO 2008-39 ug JAO 2014-01. Ikaduha, gusto ni Perez nga magbuhat ang konseho og resolusyon aron di suspensuhon ang lisensya sa mga draybers nga nakalapas sa JAO. Ikatulo, papason  ang mga pending files sa mga draybers nga maoy nakasangit sa mga draybers sa pag- renew sa ilang mga lisensya .

Si Richard Cabucos, representante sa Metro Cebu Taxi Operators miingon way due process, walay equal protection of the law ug ang ikatulo sobra ra kaayo kataas sa multahan.  Iyang giklaro nga di siya supak sa JAO apan supak siya nga i-apil og pagpamulta ang mga operators.

Gisuspenso

Giklaro hinuon ni Arnel Tancinco, direktor sa Land Transportation Office 7 (LTO – 7) nga sukad karun, wala nay laing ahensya nga aduna’y katungod nga manakop ug gisuspenso una ang deputation sa mga traffic enforcers. Iya usab giklaro nga ang JAO 2014-01 usa ka nasudnong balaod ug bisan sila di makabuot niini apan iyang gisaad nga ang tanang sentimiyento sa mga draybers ug operators makaabot sa kaulohan.

Libreng sakay

Si Cebu City Councilor Dave Tumulak, miingon nga  ang siyudad mopadagan usab sa ilang mga Kaoshiong buses aron walay mga pasahero nga matanggong sa kadalanan. Samtang sa dakbayan sa Mandaue ug Lapu-Lapu, ilang ipagamit ang ilang mga sakyanan alang sa paghatud sa mga pasahero padung sa ilang mga destinasyon sa Metro Cebu. (BANAT NEWS)