Kanhi lugar sa mga rebelde sa Talisay ipaatiman

CEBU, Philippines - Nanawagan ang kapolisan ug militar nga maatiman sa gobiyerno ang mga problema sa mga barangay sa dakbayan sa Talisay nga kanhi gilubluban sa mga rebelde.

Sa niaging semana, ang hepe sa kapolisan sa dakbayan sa Talisay, Supt. Reycel Carmelo Dayon ug mga opisyal sa Naval Forces Central (NAVFORCEN) nakigtagbo kang Mayor Johnny De los Reyes diin gituki ang kabahin sa mga “social issues” sa barangay Tanke ug Lawaan III.

Gibutyag ni Dayon nga ang mga social issues nga nakita sa maong mga barangay naglangkub sa mga “illegal settlers,” tubig nga mainom, ilegal nga drugas ug problema sa panginabuhian.

Sa Tanke nga usa ka coastal barangay dunay uban nga nalambigit og ilegal nga panagat samtang gibana-banang 35 porsiyento usab sa mga molupyo sa Lawaan III ang wala’y trabaho, 35 porsiyento ang dunay trabaho ug 30 porsiyento usab ang nalambigit sa pagpamuhat og mga trapo.

Ang Central Command pinaagi sa NAVFORCEN nisusi sa maong mga lugar ug nasuta nga wala na’y mga aktibong sakop sa rebelde apan dunay mga “legal front” nga musalmot sa mga rally.

Matud ni Dayon nga kung dili mahatagan og pagtagad sa gobiyerno ang maong mga problema posibleng gamiton kini nga isyu sa mga walhon aron makombinsi ang mga tawo nga mokuyog sa ilang grupo. Nanghinaut si Dayon nga mapaubos sa seminar sa saktong pamaagi sa panginabuhi ang mga mananagat.

Sa Lawaan III dunay “rag making” apan pipila lang ang nakasalmot sa maong panginabuhian tungod kay wala’y puhunan.

Matud ni Dayon nga unta masuportahan sa gobiyerno aron ubay-ubay ang mahatagan og panginabuhian ug matabangan sila sa pagbaligya sa ilang produkto.

Nanghinaot sila nga magahinan og pondo sa siyudad ang mga giplanong proyektong buhaton alang sa mga molupyo diha sa nahisgutang barangay samtang padayon ang operasyon sa kapolisan alang sa kahusay ug kalinaw sa Talisay. (BANAT NEWS)