Mga tourist vans sa Bohol kolorum
CEBU, Philippines - Kadaghanan sa mga sakyanan sa turista sa Bohol mga kolurom.
Kini ang gibutyag ni Gob. Edgar Chato ngadto ni Land Transportation Franchising and Regulatory Board-7 Regional Director Ahmed Cuizon.
Gibana-banang 80 porsiyento sa maong mga sakyanan mga kolorum human miangkon ang mga operators nga wala kini makakuha og prangkisa gikan sa LTFRB-7.
Matud ni Cuizon nga si Chato nihangyo sa iyang buhatan nga dili una dakpon ang mga sakyanan sama sa mga van-for-rent sanglit maapektohan ang hinayhinay nang nakabangon nga turismo sa lalawigan human sa dakong kadaut sa linog niadtong nakalabay nga tuig.
Ang maong hangyo gitunol usab ngadto kang Land Transportation Office-7 Regional Director Arnel Tancinco kinsa kusganong nibalibad sa maong hangyo.
Sumala pa ni Tancinco nga dili sila makahimo sa paghunong sa pagpatuman sa bag-ong lagda sa ilang buhatan alang sa hugot nga pagdakop sa mga kolorum nga mga sakyanan de pasaheroan aron malikayan ang dugang suliran sa higayun nga maaksidente kini sa kadalanan.
Gitambagan ni Tancinco ang mga operators sa Bohol nga molukat dayon og prangkisa sa LTFRB-7 aron dili kini sikopon sa mga law enforcers sa LTO. (BANAT NEWS)
- Latest