Mga dispatchers gipangdakop

CEBU, Philippines - Nadakpan sa kapolisan sa Mandaue ang tulo ka dispatcher didto sa Barangay Centro samtang nanawag og pasahero alas singko sa hapon kaniadtong  Biyernes.

Si PO1 Jerome Lendio sa Mandaue City Police Office (MCPO) Precint 1, miila sa mga dinakpan nga sila si  Anthony Tihara, 21, taga dalan Ouano, Barangay Looc, Alexis Beran, 23, ug usa ka menor de-edad pareho’ng taga Barangay Mantuyong.

Matud pa nga ang tulo mihimo sa ilegal nga kalihukan duol sa barangay hall sa Barangay Centro dili layo sa Mandaue City Police Office (MCPO).

Ang mga moagi nga PUJ paingon sa Park Mall sa North Reclamation Area o paingon sa Ibabao Estancia ilang pangayoan og sinsiyo bugti sa ilang pagtawag og mga pasahero nga mosakay niini. Dihang gidakop ang tulo maoy ilang nakuha gikan kanila  ang P45 nga sinsiyo nga ilang  gituohan nga kinolekta sa mga dinakpan gikan sa mga drayber sa PUJ.

Gitanggong karon ang tulo ka dinakpan sa bilanggoan ug mag-atubang sila og kaso nga paglapas sa ordinansa sa dakbayan nga nag-isip nga ang pagpangayo og salapi gikan sa mga drayber sa taxi o PUJ diha sa kadalanan giisip nga tong collection.  (BANAT NEWS)