PRO-7 director nakauyon sa bag-ong PNP uniform

CEBU, Philippines - Uyon ang hepe sa Regional Police Office (PRO) 7, Chief Supt. Prudencio Bañas sa bag-ong desinyo sa uniporme sa kapulisan.

Matud pa ni Bañas nga di kini basta lang gidesenyo kay gipahaom kini sa klima sa nasud aron komportable kini nga suoton.

Ang maong uniporme ang ginasuot na ‘sab karon ni Bañas  aron matestingan ang maong desenyo. Gipasabot sab niini nga kompara sa karaang uniporme, mas barato kini ug wa na ang mga steel badges ug insignia nga giadorno niini kay giburda na lang kini apil ang pangalan sa pulis.

Ang maong desenyo sa uniporme anaa pa sa “field test” ug magpaabot pa ang Campo Crame kung unsay reaksyon sa mga pulis nga nagsuot ingon man sa publiko. Apan alang sa mga netizens, bisan unsaon pa og usab-usab ang uniporme sa mga polis mas importante ang kinaiya ug abilidad sa nagsuot niini.

Duna say mga misaway nga mas maayong adto na lang motutok ang mga polis sa ilang trabaho pagpamenus sa krimen inay nga mag usab-usab sa ilang hitsura sa mata sa katawhan. Nasayran nga ang mga polis adunay P14,000 nga clothing allowance matag tuig. (BANAT NEWS)