P1M danyos sa sunog sa Consolacion

CEBU, Philippines - Mokabat sa P1 ka milyon ang gibilin nga danyos sa nahitabong sunog sa Barangay Tayud, Lungsod sa Consolacion nga miugdaw og lima ka panimalay lakip na sa usa ka bakery ug tindahan kagahapon sa buntag.

Si SFO1 Jemecerio Borres, imbestigador sa Consolacion Fire Station miingon nga ang  mga panimalay nga nasunog gipanag-iya sa magtiayong Braulio ug Leonila Garbo; Ruel Gabo; Cynthia Lobon nga adunay bahin nga gihimong tindahan; Romualdo Formentera nga pikas nga bahin gihimong bakery;  Edwin Garbo; Dante Garbo ug Raul  Gumalit. Base sa nahipos nga impormasyon ni Borres, ang kalayo nagsugod sa atop sa balay ni Gumalit ug dali kini kaayong mikatap sa sikbit nga mga panimalay. Gipaubos ang sunog sa second alarm. Gitug-an ni Gumalit ngadto sa mga bombero nga walay tawo sa ila niadtong higayona kay didto siya sa barbershop nga iyang gitrabahoan.Wa pa matino ang hinungdan niini. (BANAT NEWS)