Trabahante sa Metaphil mihimakak nakuhaan og shabu

CEBU, Philippines - Nipasangil ang dinakpan sa security guard sa Metaphil nga tumotumo lang ang pasangil nga nakuhaan siya og shabu atol sa pagdakop kaniya. Si Renato Pelago nga nahinabi sa Banat News miingon nga sukwahi sa pamasangil sa guwardiya nga si Joel Pogoy nga nagparikisa siya ug gani kaduha pa kini ka higayon didto sa gate sa compound sa Tsunieshi sa Balamban.

Dugang ni Pelago nga dihang padulong na unta siya mosulod gigukod siya sa usa ka guwardiya nga iyang giila nga si Pogoy ug gisitar kay wala siya magsul-ob sa iyang ID ug giingnan siya nga rekisahon.

Si Pelago miingon nga sa lugar nga naay tawo siya gustong magparekisa aron naay makakita nga lain.

Apan giingong mibalibad ang guwardiya hinungdan nga nagdumili siya sa pagparikisa kay wala’y saksi niadtong tungora ug nagdali siya tungod kay late na kaayo siya sa trabaho.

Matud ni Pelago nga nilakaw siya ug mikuha sa iyang motorsiklo ug giingnan ang guwardiya nga adto siya sa pikas gate moagi.

Dihang nakit-an na niya ang head guard, miduol siya ug nangutana nganong daw gi-hunting siya.

Matud ni Pelago nga gidala siya sa opisina ug girekisa apan wala’y nakuha ang mga guwardiya gikan sa iyang posisyon.

Nahibulong na lang siya sa balita nga dunay pito ka paketeng shabu ang nakit-an sa mga guwardiya nga matud pa iyang gilabay.

Gihimakak ni Pelago ang pasangil ug gani nagpabilin siyang gawasnon ug wala mag-atubang og kaso.

Si Zenaida Nobavos, vice-president ug chief information officer sa Metaphil nga employer ni Pelago miingon nga tungod sa maong insidente gitangtang na si Pelago sa iyang trabaho samtang nagpadayon pa ang imbestigasyon.

Apan kun mapamatud-an nga inosente siya sa ilang gihimo nga imbestigasyon mahimong makabalik si Pelago sa trabaho.

Matud ni Nobavos nga gi-ban na si Pelago sa Tsuneishi tungod sa maong insidente ug wala sila’y mahimo gawas sa pagtuman niini sanglit contractor man lang sila sa maong kompanya. (BANAT NEWS)