Duha ka fetus napalgan

CEBU, Philippines - Duha ka mga fetus ang napalgan sa managlahing dapit dinhi sa Sugbo. Usa niini nakit-an pang gilubong diha sa daplin sa dalan sa Barangay Mambaling ning dakbayan sa Sugbo ug ang usa didto mapalgi sa lungsod sa Ronda Sports Complex sa maong lungsod.

Usa ka gibanabanang unom ngadto sa pito ka bulang lalaking fetus ang napalgan duol sa usa ka lungag nga ilubong unta sa usa ka lalaki kilid sa dalan sa Maria Gochan, Barangay Mambaling, Cebu City, alas 6 sa buntag sa nakalabay nga adlaw.

Usa ka sidewalk vendor sa maong lugar nga si Bergie Remulta, 58, nga taga Alaska Mambaling maoy nakabantay sa maong fetus ug dali nga mitawag sa kapulisan.

Matud pa ni PO3 Geoffrey Gutual sa Homicide Section sa Cebu City Police Office , usa ka lalaki ang nabantayan nga dunay gilubong kilid sa kalsada ug dali nga mipalayo dihang nakabantay nga dunay nagtan-aw kaniya.

Samtang laing fetus usab ang nakaplagan sa usa ka trabahante sa lokal nga kagamhanan sa Ronda  nga gibutang sulod sa kabo diha sa pansayan sa Ronda Municipal Sports Complex niadtong Lunes.

Si Gelito Gevera nanglimpyo sa pansayan sa mga babaye dihang nakugang kini pagtan-aw sa kabo diha sa balde nga duna kini fetus. Nasuta nga nianang Mayo 31 hangtud Hunyo 2, giabangan ang sports complex  sa usa ka department store tungod sa ilang promo sales. Usa ka sales lady ang gipangita karon nga uwahing nakit-ang migamit sa maong pansayan sa wala pa makaplagi ang maong puya. Ang kapolisan nagpahigayon pa sila og follow-up operation. (BANAT NEWS)