Tagbalay gipusil sa buot mangawat

CEBU, Philippines - Samaran ang usa ka tawo sa dihang gipusil sa buot mosulod ug mangawat sa ilang panimalay sa Sitio Pasil, Datag, Maribago, dakbayan sa Lapu-Lapu sa milabay’ng gabii. Ang biktima mao si Frankie Dano Garciano, 44, ulitawo ug manindahay og isda. Sa pasiunang imbestigasyon ni PO3 Lydo Pinos nasuta nga alas 11:30 sa milabay’ng gabii nahibulong si Garciano nga mikanaas ang kasagbutan duol sa ilang panimalay hinungdan nga iyang gisusi ug nakita nga dunay tawo.

Giduol ni Garciano apan kalit siya gilayog sa tawo hinungdan sa nahitabong linayogay sa duha.

Gipusil sa tuhod si Garciano ug daling gidala sa tambalanan. (BANAT NEWS)