Flying squad sa Talisay bungkagon

CEBU, Philippines - Kutob na lang karong bulana ang kontrobersiyal nga Flying Squad sa Talisay City human gilambigit ang mga sakop  niini sa pagpangilkil og mga motorista.

Si Superintendent Reycel Carmelo Dayon, hepe sa kapolisan sa dakbayan sa Talisay mibutyag usab sa Banat News nga wala motuman sa ilang sabot ang hepe sa Flying Squad nga mo-coordinate kanila kung magpahigayon kini og operasyon sa pagpanakop sa mga malapason sa lagda sa trapiko.

Si Talisay City Administrator John Yre De los Reyes nga nahinabi sa Banat News nagkanayon nga mikabat sa 30 ang miyembro sa Flying Squad ug siyam ngadto sa 10 ka miyembro niini ang giingong nalambigit sa nahisgutang isyu ug gipaubos karon sa imbestigasyon.

Matud ni De Los Reyes nga kung mapamatud-an nga dunay nahimong kalapasan ang maong mga personnel matangtang sa ilang trabaho isip mga job orders.

Gibutyag usab ni De los Reyes nga sugod sa unang adlaw sa buwan sa Hunyo niining tuiga tangtangon na sa siyudad ang Flying Squad apan kadtong mga tarong nga mga miyembro ipaubos sa pagdumala ni Dayon.

Kahinumduman nga gikwestiyon ang katukoran sa Flying Squad  kay nahimo kining duplikasyon sa City of Talisay-Traffic Operation Development Authority (CT-TODA).

Hinuon matud niya nga aron malikayan usab ang isyu ug maka-focus sa ilang trabaho ang CT-TODA hinungdan wagtangon usab sa kagamhanan sa siyudad ang Flying Squad. (BANAT NEWS)