Upat ka kawani sa munisipyo sa Moalboal adik

CEBU, Philippines - Upat ka mga kawani sa munisipyo sa lungsod sa Moalboal ang positibo sa paggamit og ginadiling drugas atol sa gipahigayon nga surprise drug test sa Cebu Provincial Anti-Drug Abuse Council kon CPADAC niadtong nakalabay nga adlaw.

Sigon pa ni Moalboal Mayor Inocentes Cabaron sa interbyu sa usa ka radyo nga ang tulo sa upat ka mga kawani namatud-ang positibo sa paggamit og shabu samtang ang usa positibo sa paggamit og marijuana.

Ang lungsod sa Moalboal maoy usa sa mga lungsod nga nisanong sa tinguha sa Kapitolyo nga ang ila usab nga mga kawani ipaubos sa surprise drug test sa  pagdumala  sa CPADAC. Gipahibawo usab ni Cabaron nga may laing tulo ka mga kawani sa ilang lungsod ang nilighot sa gipahigayon nga drug test. Iyang gitumbok nga ang duha ka mga kawani nga nieskapo sa drug test mga driver sa munisipyo samtang ang usa anaa sa maintenance office sa lungsod.

Hinuon iyang gitataw nga ang naasoy nga mga kawani ipaubos gihapon niya sa drug test sulod ning semanaha o kaha sa sunod semana. Dugang pa sa mayor nga sa higayon nga napositibo gihapon sa confirmatory test ang maong mga kawani tangtangon sila sa ilang mga trabaho. (BANAT NEWS)