Brigada Eskwela sa Lapu-Lapu andam na
CEBU, Philippines - Andam na ang mga ginikanan ug mga magtutudlo sa dakbayan sa Lapu-Lapu sa ipahigayong "Brigada Eskwela" karong adlawa hangtud Mayo 24.
Matud ni Lapu-Lapu City Schools Division Superintendent, Dr. Eduardo Ompad, sugdan ang "Brigada Eskwela" sa usa ka caravan gikan sa Marigondon Elementary School ngadto sa Soong Elem. School sa Barangay Mactan alas 7 sa buntag karong adlawa.
Ang Brigada Eskwela usa ka tinuig nga kalihukan sa DepEd uban sa kooperasyon sa mga ginikanan nga manglimpiyo sa tunghaan diin mosud ang ilang kabataan sa adlaw sa tingklase.
Gumikan niini, giawhag ni Ompad ang kooperasyon sa mga ginikanan aron limpiyo na ang palibot sa mga classrooms bisan sulod lang sa duha ka oras nga igahin sa usa ka ginikanan nga manglimpiyo.
Samtang gikalipay ni Ompad nga pwede nang magamit og balik ang mga edipisyo sa Marigondon Elem. School ug Basak Elem. School nga naapektuhan sa 7.2 magnitude nga linog niadtong Oktobre sa miaging tuig.
Ang duha ka edipisyo nahiagum og mga liki diin delikado nga dunay mga tinun-an nga madisgrasya hinungdan nga wala una nila kini gipagamit.
Ang Mactan Air Base Elem. School (MABES) dunay usa ka lawak saringan nga delikadong mahugno hinungdan nga gipangitaan una kini og laing lawak alang sa mga tinun-an.
Hinoon ang lokal nga kagamhanan sa dakbayan sa Lapu-Lapu miabag usab og gahin sa pagpaayo sa maong edipisyo. (BANAT NEWS)
- Latest
