Usa ka polio nga giingong pusher nasikop
CEBU, Philippines - Usa ka polio victim nga suspetsadong pusher og shabu ang nasikop kagahapon mga alas 12:40 sa hapon atol sa gipahigayong aggressive patrolling sa kapolisan diha sa Sitio Tunga, Barangay Tanke, dakbayan sa Talisay.
Ang suspetsado mao si Enrique Gasalatan, 42-anyos, residente sa nahisgutang lugar.
Si Gasalatan giingong naabtan sa mga polis diha sa daplin sa karsada nga kadudahan ang lihok ug dunay gihuptan nga kolor blue nga rectangular nga medicine kit.
Giingong nasuta sa mga polis nga sulod sa nahisgutang medicine kit ang 14 ka gagmay’ng paketeng shabu hinungdan nga ang suspetsado gisikop kini.
Ang mga polis nga misikop kang Gasalatan mao sila si Inspector Rogene Fudotan, SPO1 Edgar Causon, SPO1 Benjamin Sebellita, SPO1 Isaias Cabuenas, PO3 Rey Bucao, PO3 Ferdinand Pablo, PO3 Benedicto Lasque, ug PO2 Esmer Gahi.
Si Causon nga nahinabi sa Banat News kagahapon mibutyag nga si Gasalatan nasikop usab kini kaniadto pipila ka tuig na ang nakalabay sa sama gihapong kalapasan.
Si Gasalatan gikatakdang pasakaan og kasong paghupot og ginadiling drugas karong Lunes diha sa piskaliya sa Talisay. (BANAT NEWS)
- Latest
