DuHa na usab ang enrollment sa Talisay College?

CEBU, Philippines - Mga estudyante sa Talisay City College (TCC) ug ilang mga ginikanan makaluluoy niining padayon nga kasamok sa nahisgutang eskwelahan, matud ni kanhi Kongresista Eduardo Gullas.

Niining ulahi lang, nasayran nga ang TCC mopahigayon og duha ka enrollment. Si Richel Bacaltos nga gitudlo sa Board of  Trustees (BOT) nga presidente sa TCC nagpahigayon og enrollment samtang si Paulus Mariae Cañete nga gitudlo usab nga presidente sa TCC pinaagi ni Mayor Johny Delos Reyes giingong nagpahigayon usab og enrollment.

“Religious observance of the Rule of Law equals no chaos obtaining in the prestigious Talisay City College,” matud ni Gullas.

Matud ni Gullas nga sa nahitabong kaguliyang karon sa TCC ang mga estudyante ug mga ginikanan maoy makaluluoy tungod kay sila maoy naapektohan.

Si Gullas nagkanayon nga anugon ang maong tunghaan diin sa upat ka sunod-sunod nga tuig naka-produce og mga estudyante nga mi-top sa teachers’ board exam.

“Luoy kaayo ang mga bata, ang mga ginikanan luoy kaayo….Anugon kay ang Talisay City College even if you inquire in the central office of CHED (Commission on Higher Education) it’s one of the top performing colleges in the nation,” ni Gullas pa.

Matud usab ni Gullas nga wala gisunod ang “Rule of Law” hinungdan nga nakasamok karon sa TCC.

Dihang si Gullas kongresista pa sa unang distrito misugyot siya og balaudnon sa paghimo nga state college sa Talisay City College ug sanglit wala man kini maaprobahi sa iyang termino gipadayon kini sa iyang apo nga si Kongresista Gerald Anthony “Samsam” Gullas, Jr.

Gipasabot ni Gullas nga kun mahimo na nga state college ang TCC magahinan na unya kini og budget sa national ug ang CHED na maoy modumala sa tunghaan.

Sa maong sistema ang kagamhanan sa siyudad makadaginot na unya tungod kay dili na kini mogahin pa og budget alang sa maong tunghaan.

Si Gullas nga giila nga amahan sa pagka-dakbayan sa Talisay mao usab ang mimugna sa TCC.

Nakita ni Gullas nga daghang Talisaynon ang mga utokan apan dili makapadayon pag-eskwela sa kolehiyo tungod sa ka kabus hinungdan gihimo niya sa TCC kaniadto diin barato ra ang tuition fees kun itandi sa mga pribadong unibersidad. (/RUB)(BANAT NEWS)