Lalaki gibuno gamit ang tari sa manok

CEBU, Philippines - Usa ka 23- anyos nga kargador ang namatay human gidunggab og buwang sa manok sa makadaghan nga higayon diha sa Lower Carreta, Barangay Carreta niadtong Domingo sa gabii.  Ang biktima giila nga si Raffy Benabaye Obiña, ug residente sa Sitio Kalapukan sa maong barangay.

Padayon pa karong gipangita ang suspek nga si Allan Ylaya, nga silingan ra sa biktima kinsa daling miikyas human sa maong insidente.

Si PO1 Michael Angelo Singson miingon nga nag-inom ang biktima kuyog ang iyang ig-agaw nga si Allan Obiña, ug samtang padung ang biktima duol sa diskohan, kalit kini gidunggab sa suspek.

Matud ni SPO1 Ruth Bongo-Violango nga nakahinabi sa Banat News posibleng selos ang motibo sa maong pagpatay tungod kay nagduda ang suspek nga dunay relasyon ang asawa niini ug ang biktima.

Ang biktima  nakaangkon og daghang samad sa nagkadaiyang bahin sa lawas ug gidala sa Vicente Sotto Memorial Medical Center apan namatay. (BANAT NEWS)