TRS police gipadala sa Bantayan Islands

CEBU, Philippines - Moabot na karong buntag sa Bantayan Islands ang usa ka team gikan sa Theft and Robbery Section (TRS) sa Cebu City Police Office nga moabag sa pagbantay sa mga turista nga dili mabiktima sa mga kawatan.

Ang team sa TRS nga gipadala sa Bantayan Islands gipangulohan ni Senior Inspector Elizandro Quijano nga maoy hepe sa CCPO homicide section.

Si Chief Inspector Enrique Belciña, hepe sa Police Community Relations (PCR), miingon nga ang pagpadala og mga TRS police didto sa Bantayan maoy pagtubag sa hangyo sa probinsya sa Sugbo nga tabangan sila pagpatunhay sa kalinaw sa Bantayan Islands atol sa Semana Santa.

Ang Bantayan Islands apil sa mga dapit sa Sugbo nga dugokon sa mga turista og ubang bisita ug ang mga sakop sa TRS gikinahanglan nga daghan sila og nailhan sa mga badlongon sa katilingban.

Pipila na ka tuig ang nakalabay daghang mga turista nga nagreklamo nga gipangkawatan sila sa ilang mga gamit, giilad ug gikuotan. (BANAT NEWS)