Mabdos naghikog

CEBU, Philippines - Patay nang napalgan sa iyang 5-anyos nga anak ang usa ka inahan nga gikatahong tulo ka buwan nga mabdos nga nagbitay na sa labhanan sa ikaduhang andana sa ilang balay pasado alas 5:00 kagahapon sa buntag diha sa sitio Indian, barangay T. Padilla sa dakbayan sa Sugbo.

Ang naghikog naila nga si Sylvette Ocdinaria, 31, may duha ka anak nga nagpangidaron og 11 ug 5 anyos.

Base sa imbestigasyon ni SPO1 Ruth Bongo-Violango sa Homicide Section sa Cebu City Police Office human makita sa bata ang inahan gitawag niini iyang apohan nga si Clotilde Ocdinaria, 84, kinsa mao nay mitawag sa mga silingan.

Ang mga sakop sa Emergency Rescue Unit Foundation (ERUF) nga mirespondi pinangulohan ni Lyra Castro miingon nga patay na kini.

Nasuta sa imbestigasyon usa ka adlaw sa wala pa ang hitabo mibisita sa ginang ang uyab niini apan giingong dunay nahitabong panaglalis sa duha.

Nasuta sab sa imbestigasyon nga  sa wala pa kini maghikog gitug-anan niini ang iyang 11-anyos nga anak nga mabdos siya apan gipinahan niini ang iyang anak nga dili patug-anon sa iyang apohan tungod kay masakiton kini. (/EIM)(BANAT NEWS)