Canadian Volunteer gibunala’g tubo
CEBU, Philippines - Angol ang usa ka Canadian national nga nagbakasyon ug gikatahong mitabang sa mga biktima sa bagyong Yolanda human kini pusposi og tubo sa tag-iya sa iyang giabangan nga balay sa barangay Poblacion sa lungsod sa Madridejos.
Ang biktima naila nga si Reidar Ostensen, 64, samtang ang suspek mao ang tag-iya sa balay nga iyang giabangan nga si Emilio Bacolod Fernandez Jr. nga nagpuyo sa maong lugar.
Si PO2 Jeffrey Barco sa Madridejos Police Station nga nahinabi sa Banat News miingon nga ang biktima nag-andam og dog food sa iyang iro samtang ang suspek nag-inom sa gawas sa balay kuyog ang iyang asawa ug amigo.
Matud pa ni Barco nga nagkalalis pa ang biktima ug ang suspetsado sulod sa balay ug gipangutana sa suspek kung unsay tuyo ni Ostensen sa iyang pamilya.
Sumala pa nga mitubag si Ostensen nga kaayohan lang sa iyang pamilya ang tuyo niini ug ang pag-abang niya og lawak sa balay sa suspek ug pagtabang niini pag-ayo sa maong balay nga naguba sa bagyong Yolanda usa na ka paagi niya sa pagtabang.
Apan giingong gipusposan hinuon sa suspetsado og tubo ang biktima hinungdan nga nakaangkon kini og samad sa likod nga bahin sa iyang ulo ug sa iyang lawas.
Usa sa mga kabanay sa suspek maoy misumbong sa kapolisan hinungdan sa pagkasikop sa suspek ug nadala sa Bantayan District Hospital ang biktima. /EIM (BANAT NEWS)
- Latest
