Tigpaaway og kaka dakpan, may shabu

CEBU, Philippines - Nasikop sa kapolisan sa Asturias ang usa ka lalaki nga nakuhaan nila og usa ka gamay nga pakete nga gituohang shabu ug mga gamit sa pagpa-derby og kaka didto sa Sitio Sangi, Barangay Tubigagmanok kaniadtong Martes sa gabii.

Ang nasikop naila nga si Julius Ceasar Maambong, 27, molupyo sa samang lugar. Si PO3 Victor Calimpong, desk officer sa Asturias Police Station, miingon nga pasado alas 8:00 sa miaging gabii nakadawat og tawag ang ilang buhatan nga dunay mga lalaki nga nagpundok sa Sitio Sangi nga nagpaaway og damang.

Sa pag-abot sa grupo ni Inspector Philip John Libres nabungkag ang mga nagpaaway og kaka nga nagpustahanay.

Nasikop ni Inspector Libres si Maambong nga gikatahong milabay sa duha ka basiyo sa posporo nga mibanda sa V-hire apan sa pagpunit ni PO3 Josephus Montesclaros nasuta nga may sulod kini nga usa ka gamay nga pakete nga gituohang shabu ug lima ka tin foil strips. Samtang ang usa ka basiyo sa posporo nasuta nga may sulod nga kaka nga gibutangan og gapas. 

Dihang girekisa ang suspetsado nakuhaan pa gyud kini og lima ka duplicate sa stubs sa masiao ug salapi nga P131.

Gikatakda nga karong adlawa pasakaan ang suspetsado og kaso nga kalapasan sa Sec 11 ug 12 sa Art 2 sa Dangerous Drugs Law ug illegal gambling ug RA 9287 kon illegal numbers game. (BANAT NEWS)