Langyaw sikop sa ‘Cyber crime’

CEBU, Philippines - Nasikop sa mga sakop sa Anti-Cybercrime Group, Regional Anti-Human Trafficking Task Force 7 ug sa kapolisan sa  dakbayan sa Talisay ang usa ka Swedish national pinasikad sa usa ka search warrant human gidudahang nalambigit sa cyber pornography sa maong siyudad.

Ang nasikop naila nga si Christer Kjell Johansson, 60, taga Sweden nga kasamtangang nagpuyo sa Dumlog sa nahisgotang  dakbayan. Gironda iyang balay pinasikad sa search warrant nga giisyu ni Regional Trial Court Branch 8 Judge Macaundas Hadjirasul tungod sa kalapasan sa  Expanded Anti-Trafficking in Persons Act ug Republic Act 7610 o Child Abuse.

Si Sr. Insp. Michael Vertudazo nga nahinabi sa mga tigbalita miingon nga duha na ka bulan nila nga gipanid-an si Johansson human sila hatagi og impormasyon sa hepe sa Talisay City Police Station nga si Supt. Resty Santos  kabahin sa kadudahang kalihokan sa maong langyaw.

Sumala pa ni Vertudazo nga dunay mga dalagita nga gikarelasyon ang suspetsado nga nag-edad pa lang og 14 ug 15 anyos ang duha. Sagad sa mga nabiktima sa suspetsado mao ang mga bata nga libod suroy nga pakaligoon dayon pa make-apan una pa niya kuhaan og mga hulagway.

Matud pa ni Vertudazo nga sa pag-serve nila sa search warrant didto pa sa terrace sa balay sa suspetsado ang duha ka menor.  Matud pa nga nagpasad sa sulod sa balay sa suspetsado ang mga botelya sa beer.  Narekober sa kapolisan ang duha ka laptops, passport niini, external memory, sex enhancer capsule, USB ug memory card.

Matud pa ni Vertudazo nga nasuta nila sa ilang surveillance nga kuhaan gyud og hulagway ni Johansson ang mga batang babaye nga iyang madala sa ilang balay.

Ang suspek nga nahinabi sa mga tigbalita miingon nga bakak ang tanang pasangil sa kapolisan batok kaniya apan wala na siya mohatag pa og dugang pamahayag gawas lang sa pag-ingon: “I want to talk to my lawyer.”

Pasakaan og kasong kalapasan sa Expanded Human Trafficking Law ug kalapasan sa RA 7610 o child abuse ang suspetsado.  Si Santos sa pakighinabi sa Banat News miingon nga nakadawat siya og report kabahin sa ilegal nga kalihukan ni  Johansson  maong ilaha kining gipanid-an ug dihang nakompirmar ang report nangayo sila og panabang sa Anti-Cyber Crime Group.

Midugang si Santos nga duna sila’y report nga nadawat nga dunay mga menor de edad nga mga babaye ang nakit-ang migawas sa balay nga nag-underwear lang.

Duna say report nga giingong may mga menor nga gisugo pagpalit og beer sa maong langyaw nga ‘pakigol’ kaayo ang gisuot ug nag-makeup. Si PO3 Violeta Godinez sa TCPS Women and Children Protection Desk (WCPD) mibutyag nga sa milabay’ng tuig ang asawa ni Johansson mi-report diha sa ilang buhatan tungod kay giingong bun-ogon siya niini ug gipakaulawan usab siya niini atubangan sa higalang langyaw.

Matud pang Vertudazo gibuwagan si Johansson sa asawa tungod sa pakigrelasyon niini sa mga menor. 

Sa laing bahin, usa ka ‘covenant signing’ ang gipasiugdahan sa mga opisyal sa kapolisan ug lokal nga kagamhanan sa dakbayan sa Lapu-Lapu alang sa pagsumpo sa cyber pornography sa dakbayan sa Lapu-Lapu.

Ang covenant naglatid sa "I commit and support the campaign against cyber pornography" nga gipangulohan ni Lapu-Lapu City Mayor Paz Radaza ug Cong. Aileen Radaza ug mga kadagkoan sa kapolisan.

Aduna say gilusad nga hashtag "#iamnot4sale" diin pwedeng ipasupot ang ilang suporta sa pagsumpo sa cyber crimes. (BANAT NEWS)