Kalabira nakuykoyan sa Talamban

CEBU, Philippines - Bukog sa tawo napalgan sa usa ka construction worker sa Barangay Talamban ning dakbayan sa Sugbu sa miaging hapon.

Si PO3 Lou Pagara sa Homicide Section nga nahinabi sa Banat News miingon nga dili pa sila makasulti kun ang maong bukog iya ba sa hamtong o bata ug kun babaye o lalaki ba kini.

Matud pa ni Pagara nga nakit-an kini ni Luisito Pancho sa iyang gikawot nga lungag aron butangan og poste sa kuryente.

Matud pa ni Pagara nga dihang duha na ka tiil ang nakawot nila ni Pancho ug kaubanan nakita nila ang bukog nga nabungkag maong mitawag sila dayon sa mga awtoridad.

Ang Homicide Section sa Cebu City Police Office mopasusi sa maong bukog ngadto sa PNP Crime Laboratory.

Mao na kini ang ikatulo nga kalabira nga napalgan niining tuiga dinhi sa siyudad. Una nga napalgan ang usa ka bukog sa sitio Laguerta sa Lahug nga napalgan ang usa ka kalabera nga nadala sa midahili nga yuta.

Samtang napalgan sab ang kalabera sa usa ka bata sa sitio Bakilid, barangay Quiot, dakbayan sa Sugbo sa miaging buwan.  (BANAT NEWS)