Machine shop sa presidente sa MCCI naugdaw

CEBU, Philippines - Machine shop sa presidente sa Mandaue City Chamber of Commerce diha sa eskina sa mga dalan Lapu-Lapu ug Jereza sa barangay San Roque sa dakbayan sa Sugbo naugdaw kagahapon sa hapon.

Ang nasunog mao ang Tan Chan Building nga giabangan sa Wellmade Motor Development Corporation nga gipanag-iya ni Philip Tan ang presidente sa MCCI.

Si SFO1 Lowell Opolentisima nga nahinabi sa mga tigbalita miingon nga nadawat nila ang alarma sa alas 3:17 na ang takna sa hapon ug gideklarar kini nga under control sa alas 3:33 sa hapon.

Base sa pamahayag ni Opolentisima nga ang sunog nagsugod sa higdaanan sa mga trabahante sa ikaduha nga andana sa maong building apan padayon pa nilang gisusi kung unsay hinungdan niini.

Matud pa ni Edward Sabandal usa sa mga trabahante sa maong shop nga nahinabi sa Banat News nga diha sila sa ubos dihang nahitabo ang sunog. Iya na lang nabantayan nga daw dunay nangatagak sa taas  maong migawas sila sa iyang mga kauban ug ila na lang nakita nga baga na kaayo ang aso sa ikaduhang andana.

Si Chief Insp. Wildemar Tiu, hepe sa Waterfront Police Station nga nahinabi sa Banat News miingon nga iya gilayong gipakatap ang mga sakop  sa Waterfront Police aron pugngan ang mga tawo nga  manguryuso ilabi na kadtong mga mapahimuslanon sa higayon.

Wala hinuoy gikataho nga naangol sa maong sunog base sa pamahayag sa kapolisan ug sa kabomberohan.

Ang tag-iya sa Wellmade Motors nga nahinabi sa mga tigbalita miingon nga wa siyay gibasol bisan kinsa tungod kay aksidente kini.

Mipasalig usab si Tan nga dili mawad-an og trabaho ang iyang mga empleyado kay ibalhin lang sila og lain nga branch. Si Opolentisima mibana-bana sa danyos nga moabot og P50 mil apan si Tan miingon nga mokabat og usa ka milyon ka pesos ang danyos sa iyang machine shop.  (BANAT NEWS)