Balhinan sa mga squatters ayuhon g’yud

CEBU, Philippines - Ang kapin sa unom ka hektareya nga luna didto sa Barangay Paknaan, dakbayan sa Mandaue nga maoy pabalhinan sa mga “informal settlers” giabunohan na og lapok ug anapog aron malikayan nga kini malunopan.

Si Tonypet Juanico nga maoy pangulo sa Housing Urban Development Office (HUDO) sa dakbayan sa Mandaue miangkon nga lupa ang mao nga dapit nga himoon nila nga relocation site. Kini maoy rason nga ang mga opisyal sa Mandaue mipa-abuno sa mao nga dapit aron nga ang mga mopuyo unya sa mao nga luna dili na malunopan kun adunay kusog nga uwan.

Gipahimoan usab og paril sa mga opisyal sa Mandaue ang masi’g ka daplin sa mao nga yuta nga nahimutang sa ubos aron nga mapugngan ang pagpangatumpag sa lapok.

Hinuon giangkon ni Juanico nga kun adunay kusog g’yud nga uwan hayan dili gayud malikayan nga malunopan ang mao nga dapit apan iyang gipaniguro nga dali na kini mohubas.

Gibutyag ni Juanico nga ang kagamhanan sa Mandaue naghimo gayud sa tanang paninguha nga dili masakripisyo ang mga tawo nga adto unya papuy-on sa relocation site.

Ang mga opisyal sa Mandaue nakigtambayayong sa kadagkoan sa Department of Public Works and Highways (DPWH) 7 aron mabutangan og mga imbornal ang dapit nga usa sa paagi paglikay sa lunop.

Gipaspasan usab sa mga opisyal sa Mandaue ang pagbutang og mga batakang panginahanglan sa katawhan sama sa tubig, kuryente, day care center sa kabataan ug ang maayong nga agianan sa mga sakyanan.-(/RUB)(BANAT NEWS)