Gwardiya milayat sa Mactan Bridge
CEBU, Philippines - Usa ka batan-ong lalaki naluwas human milayat sa Mactan -Mandaue Bridge sa habig nga bahin sa barangay Looc, dakbayan sa Mandaue kagahapon sa buntag.
Ang milayat mao ang 20- anyos nga taga barangay Pajo, dakbayan sa Lapu-Lapu nga usa ka security guard sa usa ka dakong tindahan sa dakbayan sa Mandaue.
Si SPO2 Juan Calamba sa kapolisan sa Presinto 5 sa Mandaue Police Station miingon nga gikan pa sa iyang pang-gabii nga duty ang maong gwardiya ug naglakaw lang pauli sa dakbayan sa Lapu-Lapu.
Apan paghidangat niini sa tungatungang bahin sa taytayan giingong may nakakita nga kalit kining mitungtong sa railings ug miambak sa dagat.
Ang molupyo sa sitio Paradise sa barangay Looc diha sa ubos nga nakakita sa hitabo daling nikuha og motor banca ug ila kining naabtan nga wala nay panimuot ug gihaw-as sa dagat ug gidala sa Mandaue City Hospital.
Si Calamba miingon nga nagdumili pagtubag ang maong batan-on, apan ang kabanay niini mitug-an kanila nga magsige og inom ang maong batan-on. (BANAT NEWS)
- Latest
