Mga dinamitero nadakpan apan sila gipangbuhian

CEBU, Philippines - Nadakpan sa mga sakop sa Bantay Dagat didto sa dakbayan sa Bogo ang upat ka mangingisda nga nakuhaan og mga illegal nga kagamitan sa pagpanagat didto sa gitawag og Ormoc Shoal nga sakop na sa mao nga dakbayan.

Ang nasikop kaniadtong Martes sa buntag mao sila si Rene Zambo, 48, Aurelio Zambo, 31, Ronito Alburo, 30 ug si Jhonry Ochea, 30, pulos mga molupyo sa Sitio Lover’s Lane, Barangay Nailon, dakbayan sa Bogo.

Nasigpatan sila sa mga sakop sa Bantay Dagat nga nagpatrolya sa kadagatan sa mao nga dapit tungod sa report nga adunay mangisda sa mao nga lugar gamit ang dinamita.

Dihang gisita sila sa mga sakop sa Bantay Dagat nasuta nga may dala sila nga 17 ka blasting caps, usa ka flashlight, duha ka paresan sa antepara alang sa pagsawom, duha ka posporo, lima ka rubber nipple ug usa ka botilya nga puno sa ammonium nitrate.

Ang ammonium nitrate usa ka matang sa abuno nga alang sa mga tanom apan mahimo usab nga gamiton isip pulbora sa dinamita. Matud sa mga sakop sa Bantay Dagat nga klaro kaayo nga ang mga dinakpan pulos mangisda gamit ang dinamita kay aduna sila’y blasting caps.

Nasakmit usab gikan kanila ang tulo ka kilo nga isda nga gituohang kuha  pinaagi sa dinamita. Hinoon, gibuhian ra sa kapolisan ang maong mga mananagat human sila makabayad sa pyansa nga mikabat og P20 mil. (BANAT NEWS)