Rota sa mga PUJ sa SRP gitinguha

CEBU, Philippines - Hayan nga katugotan na ang mga passenger jeepneys nga makabiyahe sa South Road Properties (SRP) dinhi sa dakbayan sa Sugbo. Kini human si Mayor Michael Rama walay pagsupak sa mao nga sugyot  alang sa katumanan sa damgo sa mga drayber og PUJ’s nga aduna sila’y rota diha sa SRP.

Matud sa mayor nga iyang hatagan og pagtagad ang maong sugyot kay daghan man unya ang makabenepisyo ilabi na kun mahuman na ang pagtukod sa higanteng mall sa SM diha sa SRP.

Apan gusto sa mayor nga patun-an usa pag-ayo ang tinguha. Duna ‘say sugyot nga gawas sa PUJ’s, tugotan usab nga makabiyahe sa SRP ang mga bus.

Samtang walay pagsupak si Regional Direktor Ahmed Cuizon sa Land Transportation Franchising and Regulatory Board (LTFRB-7) nga adunay mugnaon nga rota sa mga public utility vehicles sa SRP.

Ang LTFRB wala pay nadawat nga aplikasyon gikan sa mga PUJ operators nga gusto’ng mobiyahe sa SRP gawas lang sa aplikasyon sa SM nga gusto nga adunay bus nga katugotan pagbiyahe sa maong dapit.  (BANAT NEWS)