Nakasaghid og traysikad maoy namatay
CEBU, Philippines - Patay ang drayber sa motor human kini makasaghid og traysikad pasado alas 9 sa miaging gabii didto sa Barangay Liong, lungsod sa Dumanjug.
Ang namatay naila nga si Raul Belogolo, 39, molupyo sa barangay Paculob sa Dumanjug. Samtang angol si Raul Delgado, 38, molupyo sa sitio Lomboy, barangay Lawaan sa lungsod sa Dumanjug. Base sa imbestigasyon sa kapolisan nga nakadawat sila og tawag nga dunay nadisgrasya sa barangay Liong ug dali nila kining girespondihan.
Nasuta sa imbestigasyon nga nagsunod si Belogolo sa traysikad ni Delgado apan dihang mi-overtake kini nasaghiran niya ang traysikad hinungdan nga nalimbuwad ang sikad ug natumba ang motor.
Grabing kadaot ang naangkon sa duha ug daling gidala sa tambalanan sa miresponding polis. Apan matud pa sa kapolisan nga si Belogolo nga gidala sa usa ka tambalanan sa dakbayan sa Sugbo giingong namatay tungod sa kadaot nga iyang naangkon. (BANAT NEWS)
- Latest
