Nakapatay sa Bohol nadakpan sa Mandaue City

CEBU, Philippines - Gidakop sa  kapolisan ang usa ka suspetsado sa pagpatay didto sa Talibon, Bohol nga mitago sa Holy Spirit Subdivision sa barangay Pagsabungan, dakbayan sa Mandaue kagahapon sa buntag.

Ang gidakop mao si Jovane Autida  Gurrea, 23, lumad nga taga Purok 7,  barangay Zamora  Talibon sa lalawigan sa Bohol.

Si SPO2 Danilo Barrita  sa Presinto 3 sa Mandaue City Police Office (MCPO)  miingon nga ang dinakpan maoy suspetsado sa pagdunggab patay sa usa ka Torribio Averganzo, 42, niadtong Enero 26 sa Purok 3, barangay San Carlos, Talibon.

Natultolan sa kapolisan sa Talibon ang gitagoan niini human dunay nakasumbong nga diha kini nitago sa iyang mga kabanay sa Mandaue.

Samtang duha ka gipasanginlang karnaper nga nangawat og motor sa barangay Luyang, Carmen ang nangadakpan sa sitio Pasil, barangay Maslog, dakbayan sa Danao sa miaging adlaw.

Ang nangadakpan mao sila si Gerald de Guzman, 31, ug Jovanie Cañete Lao Jr., 33, taga Beatriz Village, barangay Poblacion sa mao gihapong dakbayan.

Gikawat sa duha ang motorsiklo ni Jason Barro nga giparking niya sa Barangay Luyang  apan dunay nakatug-an nga si De Guzman ang mikuha niini.

Si PO3 Phil Restauro sa Carmen Police Station misikop ni  De Guzman sa ilang balay ug didto nahibaw-an nga giprenda na niya  ang motor kang Lao hinungdan nga hasta ang nauwahi giapil og dakop ug nabawi ang motor.

Matud pa nga sa pagrekisa kanila nakuhaan silang duha og tagsa ka paketeng may sud nga gidudahang shabu.

Ang duha gitanggong karon sa Carmen Police Station. (/EIM)(BANAT NEWS)