Nang-hostage sikop
CEBU, Philippines - Nasikop sa kapolisan ang usa ka hubog nga ama-ama sa duha ka bata’ng babaye human iyang gi-hostage ang duha ug iyaha untang lumsan sa sapa pasado alas 5:00 kagahapon sa buntag sa sitio Minolida barangay Calamba sa dakbayan sa Sugbo.
Ang nasikop naila nga si Rolito Ymbong, 29, taga dakbayan sa Lapu-Lapu. Nakaikyas ang usa sa mga gi-hostage apan nakuptan niini ang gibanabanang 4-anyos nga anak sa iyang kapuyo.
Sumala pa sa imbestigasyon sa kapolisan mianha sa balay sa kapuyo si Ymbong kay nasuko nga wala na kini mouli sa ilaha.
Sumala pa sa Barangay Tanod sa Calamba nga si Dante Biscocho nga usa sa miresponde sa maong alarma nga nahinabi sa Banat News nga miabot og usa ka oras ang negosasyon.
Ang suspek armado og kutsilyo samtang gikuptan ang bata. Apan nahaylo kini nga manigarilyo ug diha na kini giambakan sa hepe sa tanod nga si Bonifacio Baguio ug sa uban pang mga tanod. Daling gidala ang suspetsado sa Taboan Police Station samtang giandam pa ang mga kaso nga ipasaka batok kaniya. (/EIM)(BANAT NEWS)
- Latest
