‘Panagtagbo sa Mandaue’ himuon karong hapon

CEBU, Philippines - Karong adlawa ipahigayon ang “Panagtagbo sa Mandaue”  diha sa barangay Centro sa dakbayan sa Mandaue  sugod sa alas 4 ang takna sa hapon. Bisan sa maong kalihokan nga pagahimoon ang Traffic Enforcement Agency of Mandaue (TEAM) dili mopatuman og rerouting apan magbutang sila og daghang mga traffic enforcers alang sa paghapsay sa dagan sa trapiko.

Ang Panagtagbo sa Mandaue nga nahimong tinuig nga kalihokan sa dakbayan nunot sa tinuig nga pangilin ni Senyor Santo Niño sa dakbayan sa Sugbo isip sa pagpangandam sa paghidangat sa iyang imahen nga dad-on sa National Shrine of Saint Joseph sa barangay Centro sa dili pa ang adlaw sa fluvial procession sa Sabado.

Si Editha Cortes sa Taga Mandaue Inc. sa press conference mipasabot nga ang Panagtagbo sa Mandaue maoy panag-abot sa imahen sa Balaang Pamilya nga si Senyor San Jose, Birhen Maria ug sa ilang anak nga si  Senyor Santo Niño.

Matud pa niya nga magsugod ang maong kalihokan pinaagi sa Santos nga Misa sa sulod sa National Shrine of Saint Joseph sa barangay Centro ug sundan kini sa pagprosisyon sa tulo ka mga imahen. Dugang pa niya nga ang imahen ni Senyor San Jose  adto sa barangay Ibabao sa atubangan sa Cortes General Hospital ug mosubay kini sa dalan Sotero Cabahug paingon sa simbahan National Shrine of Saint Joseph. Ang imahen ni Senyor Santo Niño nga mosubay sa dalan Catalino C. Ouano adto manukad sa atubangan sa City Central School ug mosubay usab sa nahisgotang dalan paingon sa maong simbahan.

Ang imahen ni Birhen Maria nga manukad sa City Health sa sitio Tribunal  adto usab mosubay sa dalan Sotero Cabahug Extension paingon gihapon sa nahisgutang simbahan.

Dugang pa ni Cortes nga magdungan sa paggikan ang tulo ka prosesyon ug magdungan usab og abot sa National Shrine of Saint Joseph sa barangay Centro isip “panagtagbo” niini.

Si  Luella Cabañero nga maoy tourism officer sa maong dakbayan nga nahinabi sa Banat News miingon nga tambongan sa mga balikbayan ang maong kalihokan nga namauli karon dinhi sa Sugbo gikan sa gawas sa nasud.

Dugang kalihokan mao ang pagbukas sa Bibingkahan sa Mandaue nga pagahimoon sa Heritage Plaza diin sa maong dapit usab nagpaabot ang  Sinulog dancers sa Mandaue City School for the Arts  nga mohalad usab og Panagtagbo dance atol sa maong kalihokan. (BANAT NEWS)