Mangunguot gikan Ormoc nadakpan

CEBU, Philippines - Nasikop sa kapolisan sa Waterfront Police Station ang usa ka lalaki nga nasakpan sa akto nga mikuot sa cellphone sa usa ka estudyante sa gawas sa Basilica Menore del Sto. Niño sa miaging adlaw.

Ang biktima naila nga si Regine Yap, 19, usa ka tinun-an sa kolehiyo sa dakbayan sa Sugbo.

Samtang ang suspetsado naila nga si Samuel Cortez Balawit, molupyo sa Kalaw Street, sa dakbayan sa Ormoc.

Matud pa ni Chief Insp. Wildemar Tiu ang hepe sa Waterfront Police nga si Balawit usa ka dayo nga mipahimulos sa higayon tungod sa kapistahan sa Sinulog. Pwerteng luhod-luhod sa suspetsado ngadto sa biktima nga nangayo og pasaylo sa iyang nabuhat kagahapon ug nangangkon nga nabuhat nila kadto tungod kay nagkinahanglan siyang makakita og kwarta aron iplete nga makauli sa Ormoc.

Matud pa ni Tiu nga duna pay laing upat ka mga cellphones nga nabawi gikan sa suspetsado ug iya nang gi-contact ang mga tag-iya niini.

Sumala pa sa suspetsado nga iyang modus mao nga banggaan ang iyang biktima ug kuoton niya ang mga cellphone  o pitaka sa bulsa niini.

Laing estilo niya mao nga sundan ang biktima nga padulong mosakay sa jeep ug sa pagtungtong niini sa pultahan didto niya kuoton ang ilang mga gamit.

Apan matud pa sa suspetsado nga moila lang gihapon siya og gaba maong sa gawas sa Basilica Minore del Sto. Niño ra siya nanguot ug wala sa sulod niini. Gipasaylo ra hinoon si Balawit ni Yap human nga miluhod kini sa iyang atubangan. (/EIM)(BANAT NEWS)