Dugang assistance mag-agad sa surplus sa siyudad — Rama
CEBU, Philippines - Gihatagan og gamay’ng paglaum ni Mayor Michael Rama ang mga senior citizens dinhi sa dakbayan sa Sugbo pinaagi sa pag-ingon nga may kahigayonan gihapon nga mohatag siya’g cash assistance nga subra sa P6,000 karong tuiga.
Hinuon gitataw sa mayor nga magdepende na kini kun adunay subra nga kwarta ang dakbayan aron nga matuman niya ang gisaad atol sa kampanya nga himoon na nga tag P12,000 ang cash assistance sa mga senior citizens karong tuig 2014.
Si Mayor Rama miingon nga ang pahibalo niya nga P6,000 lang ang cash assistance nga ipahatag sa mga senior citizens nagumikan kini sa pag-aprobar lang sa City Council og P5.8 Bilyones nga Annual Budget karong tuig ug wala aprobahi ang gisugyot niya nga P10.5 Bilyones.
Apan matud ni Mayor Rama nga kun ang dakbayan sa Sugbo adunay dugang koleksyon gawas sa makolekta nga buhis, sama kun makabaligya kini og kayutaan sa South Road Properties (SRP), daku ang kahigayonan nga dugangan niya ang P6,000.
Adunay mga senior citizens nga naguol pagkasayod nga inay P12,000 ang madawat nila karong tuiga, katunga na lang ang kantidad ang ilang madawat.
Si Mayor Rama miingon nga naglaum siya nga sa labing dali nga panahon makabaligya og yuta ang dakbayan aron makahimo pa sila og daghang proyekto alang sa katawhan.
Sa laing bahin, ang City Hall mo-release na karong adlawa sa kuwang nga cash assistance ngadto sa mga Persons With Disabilities (PWD) ug ang kuwang cash assistance sa mga opisyal sa kabarangayan.
Dunay kapin sa 9,000 ka PWD’s nga modawat og tag P2,000 samtang dul-an sa usa ka libo ka PWD ang makadawat og kompleto nga tag P5,000 kay wala man sila makakobra sa miaging tuig. (BANAT NEWS)
- Latest
