FDA mipasidaan sa kapeligro sa bahaw nga pagkaon

CEBU, Philippines - Ang Food and Drug Administration (FDA) mipahimangno sa publiko kalabot sa risgo nga mahiaguman gikan sa pagkaon og mga sobra nga pagkaon.

Matud pa ni acting FDA General Kenneth Hartigan-Go nga ang maayong panukdanan maoy angay nga pagabuhaton aron malikayan nga ang mga salin o bahaw nga pagkaon maoy mahimong tinubdan na unya sa  sakit human  sa mga  holidays.

Gipasabot ni Go nga ang mga salin nga pagkaon kasagaran molabaw pa kini sa katunga gikan sa  mga  pagkaon  nga gisulod sa refrigerator.

Kini mahitabo  sa panahon sa mga holidays busa kinahanglang dumalahon  kini pag-ayo  nga  mahimutang  sa bugnaw  kaayo nga  bahin  sa ref  aron  nga  dili  mapan-os.

Nagkanayon si Go nga kinahanglang ipaniguro sa publiko nga ang ilang pagkaon nga gisulod sa ref maayo nga pagkapreserbar ang  temperature  niini makamatay  sa  mga kagaw  nga posibleng mutakboy sa mga pagkaon.

Sumala pa ni Go nga ang refrigerator kinahanglang dili gayud  puno kaayo tungod kay kung  puno kini, mahimong mapugngan ang sirkulasyon sa hangin  nga moresulta na  hinuon  sa pagbaton  og dili  bugnaw  nga  bahin sa ref.

Gibutyag ni Go nga mas maanindot gayud nga ang mga tawo kaantigo mokontrolar sa ilang andamon nga  pagkaon aron malikayan nga adunay mga sobra-sobra  o bahaw.  (BANAT NEWS)