Dumot maoy gituohang hinungdan sa pagpusil sa papa ug mga anak

CEBU, Philippines - Gimandoan ni Provincial Director sa Cebu Provincial Police Office Sr. Supt. Noel Gillamac ang hepe sa kapolisan sa lungsod sa Minglanilla sa pag-imbestigar ug makig-alayon sa barangay kapitan sa barangay Campo 7 aron mailhan ug mataral sa hukmanan ang namusil sa mga manag-amahan diha sa maong barangay sa miaging gabii.

Ang kapolisan nagdudang kaila ra ug dugay nang nakaaway ug nagdumot sa pamilya sa mga biktima ang mga mamumuno.

Si Gillamac mibutyag sa Banat News nga iyang giawhag ang hingtungdang mga opisyal nga mopatunga dayon kun dunay mga panagbingkil aron di mosangpot sa susamang mga krimen.

Sabado sa gabii dihang gipamusil patay sila si Rene Secretaria, 20, ug Julius Secretaria, samtang naangol ang ilang igsuong si Jojo Secretaria, 33,  amahan nga si Danilo Secretaria, 57, ug pag-umangkon nga si Jonh Mark Secretaria, 7.

Ang pamilya nga Secretaria nga gikan sa diskohan giatangan ug gipamusil sa duha ka mga lalaki.Matud pa ni PO2 Omar Parages nga nahinabi sa Banat News kinsa usa sa mga polis nga nagbantay sa maong diskohan nga ngit-ngit kaayo ang lugar diin nahitabo ang krimen.Ug matod pa ni Parages nga posible nga dumot ang hinungdan sa maong pagpamusil.Duna na hinuoy suspek ang kapolisan sa maong krimen ug karon padayon na nilang gipangita.  (BANAT NEWS)