10 mil gikabalak-ang nakalas
CEBU, Philippines - Ang higanteng balud nga mugna sa naghaguros nga hangin nga gidala sa bagyong Yolanda maoy gituohan nga mibanlas sa kabalayan sa Tacloban, Leyte ug mikalas usab sa kinabuhi sa gibanabanang 10,000 ka mga tawo nga molupyo niini sa taho sa Agence France Presse.
Si Chief Supt. Elmer Soria sa kapolisan sa nahisgotang lalawigan nga nahinabi sa mga tigbalita maoy mipadayag nga gikabalak-an nilang liboan gyud ang nakalas sa maong katalagman.
“We had a meeting with the governor and, base on the government’s estimates, initially there are 10,000 casualties,†ni Soria pa sa iyang pamahayag.
“About 70 to 80 percent of the houses and structures along the typhoon’s path were destroyed,†dugang pa niya.
Mipadala na ang militar og 15,000 ka mga sundalo sa lugar inabagan usab sa kapolisan lakip na ang gikan sa Cebu aron tabangan ang mga apektadong lugar ug mamentinar ang seguridad ug kalinaw tungatunga niini desperasyon sa mga tawo.
Samtang sa silingang isla sa Samar dunay gika-report nga 300 usab ka mga tawo ang namatay sa usa ka lungsod.
Ang mga nakasaksi sa maong dapit miingon nga sa pag-igo sa bagyong Yolanda maoy ilang namatikdan ang dagkong balod nga mokabat sa 17 ka tiil ang gihabugon nga maoy mibanlas sa kabalayan sa maong lugar.
“The effects are very similar to what I have seen in a tsunami rather than a typhoon,†pamahayag pa sa AFP ni Praveen Agrawal nga maoy direktor sa World Food Program sa Pilipinas nga mibisita sa Tacloban.
Gipahibalo usab sa NDRRMC nga abli na ang San Juanico Bridge padung direkta sa Tacloban City sa amihanang bahin ug pinaagi niini mapadali na ang pagbiyahe sa mga hinabang. (Romeo Limpangog ug reports gikan sa Wires/EIM)
- Latest