Motor misampak sa awto sa Bise Mayor

CEBU, Philippines - Usa ka wala pa mailhing lalaki nga nagmaneho og motor ang nasampak sa luyong bahin sa usa ka awto sa bise mayor sa Samboan diha sa barangay Bitoon sa lungsod sa Dumanjug sa alas 2:30 sa miaging hapon.

Ang SUV gisakyan mismo ni Samboan vice mayor Emerito Calderon Jr. apan gimaneho ni Sanelieto Arreglado Areja, 31.

Si PO2 Ramon Chinel, imbestigador, nga nahinabi sa Banat News nga ang Toyota Vios Sedan sa bise-mayor padung sa dakdayan sa Sugbo samtang nagsunod ang biktima luwan sa usa ka Honda Wave nga motor nga may plate number 4628 OT nga gimaneho sa biktima.

Sumala pa sa imbestigasyon ni Chinel, pag-abot sa duol sa buhatan sa Cebeco I sa barangay Bitoon gikataho nga naay misulod nga sakyanan sa atubangan sa sakyanan ni Calderon busa mikalit og brake ang iyang drayber.

Apan wala makabantay ang biktima nga nagsunod niadtong tungora ug wala na makalihay ug napaslak sa ilawom sa sakyanan nga nakaingon sa kadaot sa iyang ulo ug tiil. Nasuta usab ni Chinel nga wala magsuot og helmet ang biktima.

Daling gidala sa Barili District Hospital ang maong lalaki apan gibalhin ra pud kini dayon sa Vicente Sotto Memorial Medical Center.

Nasuta usab nga ang motorsiklo walay Official Receipt ug Certificate of Registration ug wala usab sila’y nakita nga lisensya. (BANAT NEWS)