Pison natagak drayber patay

CEBU, Philippines - Patay ang drayber sa usa ka road roller o pison human kini matagak sa Happy Valley Compound sulod sa Carmen Copper Corporation sa Don Andres Soriano sa dakbayan sa Toledo pipila ka oras human sa linog niadtong Martes.

Base sa spot report sa Cebu Provincial Police Office (CPPO) nga ang drayber naila  nga si Rolando Astromo, 40 anyos, lumolupyo sa sitio Panagdait sa Don Andres Soriano sa dakbayan sa Toledo.

Basi sa taho nga gisumiter sa gwardiya sa Carmen Copper Corporation sa Toledo City Police Station nga ang kauban nga empleyado sa biktima nga sila si Roger Repompo usa ka backhoe operator ug si Ponciano Alberca usa ka spotter  ug ni John Rey Pardillo nakadungog og usa ka buto.

Nahibaloan na lang ni Repompo, Alberca ug ni Pardillo nga natagak ang gimaneho nga road roller compactor sa biktima.

Daling gidala sa Carmen Copper Corporation Hospital ang biktima apan gideklarar kini nga dead on arrival.

Matud pa ni SPO1 Thule Tajanlangit sa Don Andres Soriano Police Sub-Station sa Toledo City sa pakighinabi sa Banat News nga uwahi kaayo nga gi-submit sa mga gwardiya sa maong kompanya ang report bahin sa aksidente.

Sumala pa niya gihatud ang report kanila niana nang pagkagabii “vehicular accident” ra ang gibutang ug niana nang pagkabuntag pa nila nabasahan sa tumoy sa report nga dunay namatay sa maong aksidente.

Matud pang Tajanlangit usa sa problema nila sa Carmen Copper Corporation nga dugay gyud mopahibalo kanila ang management kung dunay mga maaksidente sa ilang trabaho.

Kini sama sa nahitabo sa milabay’ng bulan nga dunay natagak nga ekipo nga nakalas usab ang operator dihang midahili ang yuta. Matud pang Tajanlangit nahitabo kadto sa kaadlawon apan pagka-alas tres na sa hapon gipahibalo ang kapolisan.

Sama sa nahitabo sa milabay’ng bulan, ang aksidente niadtong Lunes  wala na ma-imbestigar pa sa kapolisan aron pagtino kung dunay sad-an sa nahitabo aron mahatagan og hustisya ang tagtungod sa mga nakalas. (BANAT NEWS)