Mipatay sa asawa kapuyo ra

CEBU, Philippines - Mitahan kagahapon sa buntag sa Lapulapu City Police Office (LLCPO) ang usa ka lalaki nga suspetsado sa pagpatay sa iyang kapuyo  didto sa  purok Adelpa,  barangay Looc, dakbayan sa Lapulapu. Ang suspetsado  mao si Marlon Montecillo, 26, ug lumad nga taga lungsod sa Sogod sa amihanang bahin sa lalawigan sa Sugbo.

Ang  biktima mao  si  Estela Marie Tumulak, 22  ug nagtrabaho isip cashier sa usa ka gasoline station sa dakbayan sa Sugbo.

Si PO2 John Carlo Jocotan sa homicide section sa kapolisan nga nahinabi sa Banat News miingon nga kauban sa suspetsado sa iyang pagtahan mao ang 6 anyos niining anak nga giingong gidala usab niini sa iyang pag-ikyas human sa iyang pagdunggab patay sa biktima sulod sa 46 ka higayon.

Ang bata  dali nga gikuha sa apohan  niini  sa bahin  sa inahan. Nahiadto  sa buhatan  sa kapolisan  ang  inahan sa namatay   dihang  gipahibalo kini sa kapolisan  bahin  sa  pagtahan ni Montecillo .

Matud pa ni PO2 Jocotan nga ang naghinubrang pangabubho ngadto sa biktima maoy hinungdan sa pagpatay ni Montecillo  niini. Gitug-an usab sa suspetsado nga gihasol na siya sa iyang tanlag sa salaod nga iyang nahimo ug dili na kini mahimutang nga maoy nakaaghat  kaniya sa pagtahan.

Gitug-an  usab ni Montecillo nga iyang giatngan ang biktima dihang padulong kining maligo sa puso nga nahimutang sa sulod sa compound  nga  ilang gipuy-an didto sa  barangay Looc.

Human sa iyang pagpatay dali kini miikyas  pahilayo sa maong dapit kuyog sa 6 anyos nilang anak. Mipauli  siya  sa ilang lungsod sa Sogod ug didto na magtagotago sulod sa pipila ka mga adlaw .

Si PO2 Jocotan miingon nga  kasong murder maoy ilang ipasaka ngadto sa korte batok kang Montecillo kinsa temporaryo  karon nilang gibalhog sa sulod sa ilang detention cell. (/WC) (BANAT NEWS)