3 ka brgy sa Mandaue wa pa kahatag sa P10M sa Comelec

CEBU, Philippines - Ang tulo na lang ka barangay sa dakbayan sa Mandaue maoy wala pa makahatag sa ilang cash donation nga P10,000 ngadto sa buhatan sa Commission on Election (Comelec)  alang sa Oktubre 28, 2013 barangay election, matud pa ni  Atty. Ann Fleur Gujilde, Comelec officer sa maong dakbayan kagahapon.

 Iyang giila ang tulo ka barangay nga  mao ang  barangay Tipolo, barangay Opao ug barangay Tabok.

Matud pa niya nga  ang mga tresurero sa maong  mga barangay  padayon na sa paghikay sa mga dokumento aron mogawas  ang ilang pundong salapi. Gitug-an ni Atty. Gujilde nga ang P10,000 nga ilang madawat nga cash donation sa 27 ka barangay sa dakbayan dili pa gayod paigo alang sa ilang galastohan alang  sa   honorarium sa mga Board of Election Tellers, Board of Election Supervisors ug uban pa nilang panginahanglan  sa paghingpit sa kalampusan sa barangay election.

Dugang pa niya nga karon naglaraw  sila  nga  mangayo  og  dugang  ayuda  gikan sa kagamhanan sa maong dakbayan.

Si Mayor Jonas Cortes dihang nahinabi sa mga tigbalita kalabot sa maong  isyu mipadayag nga andam  kining  mohatag  bisan  pila  ang  kinahanglanon  sa  Comelec.  (BANATNEWS)