Suspek nga drug pusher naabsuwelto
CEBU, Philippines - Naabsuwelto sa kasong pagpamaligya og gidiling drugas sa barangay Sambag 1 ning siyudad sa Sugbo ang giingong drug pusher tungod sa kakuwang sa pamatuod.
Kini dihang ang duha ka mga polis nga nagsikop sa akusado wala makahatag og tukmang mga ebedinsiya ngadto sa korte isip kamatuoran nga drug pusher ang suspetsado.
Ang nakalingkawas sa kasong pagpayuhot og gidiling drugas mao si Carlito Lora Jr. alyas Tube Padin Dayoha, nga taga barangay Sambag 1 syudad sa Sugbo.
Nasayran nga si Lora nadakpan niadtong Mayo 31 tuig 2010 atol sa gipahigayon nga buy-bust operation sa kapolisan sa Police Station 1.
Sila si PO2 Marvin Sanson ug PO2 Joel Cunan maoy nakasikop sa akusado.
Si RTC-7 Branch 13 Judge Meinrado Paredes mitug-an sa iyang desisyon nga niadtong Martes napugos siya sa pag-absuwelto sa akusado sa kasong pagpamaligya og gidiling drugas tungod kay ang mga napresentar nga serkumstansiya ug mga ebedinsiya sa prosecution dili pa igo nga makakonbikto kaniya.
Iyang gipasabot nga atol sa mga hearing sa iyang sala wala’y bisan usa sa mga polis nga nakadakop kaniya nga nakaila sa tinuod nga ngalan sa akusado. Nakita usab niini nga ang arresting officer nga si Sanson, layo ra kayo sa gihimong buy-bust operation.
Ang serial number sa buy-bust money wala mapatik sa pre-operation report, atol sa drug operation.
Wala’y presensiya sa mga sakop sa media ug mga opisyal sa barangay isip saksi sa pag-imbentaryo sa mga nahipos nga mga ebedinsya nga tataw nga nahasupak sa nalatid sa balaod.
Napakyas usab ang mga polis sa paghimo og chain of custody sa mga ebedinsya ug mga resibo ug wala usab sila mosumiter og coordination report sa Philippine Drug Enforcerment Agency (PDEA).
Sigon sa huwes nga ang labaw nga dakong buslot sa maong ebedinsya sa prosecution mao ang kapakyas sa pagtudlo ni PO2 Cunan sa akusado dihang gipa-identify kini sa korte. (BANAT NEWS)
- Latest