Mga sakyanan nasikop sa DPWH ug CITOM

CEBU, Philippines -  Daghang sakyanan, mga passenger jeepney, pribadong sakyanan ug mga motor, nadakpan sa kinalit nga operation nga gihimo sa mga sakop sa Department of Public Works and Highways (DPWH), inabagan sa CITOM ug Land Transportation Office nga giparada og gipabuntagan daplin sa karsada.

Tulo ka sakyanan ang gi-impound tungod kay wala’y mga tag-iya nga miabut dihang naaktohan sa mga sakop sa team ang ilang sakyanan nga diha daplin sa karsada.

Matud ni Joy Tumulak nga maoy operations officer sa CITOM nga ang DPWH pinaagi sa ilang regional director nga si Ador Canlas maoy mimando nga tudloan og leksyon ang mga tag-iya sa sakyanan nga anha ra pabuntagi sa karsada.

Kapin sa 20 ka drayber ang naisyuhan og Temporary Operators Permit (TOP) ug gisakmit ang ilang mga lisensya tungod sa pagparking sa wala itugot nga dapit, ang uban giisyuhan lang og Traffic Citation Tickets.

Ang Banat News misuhid usab sa lainlaing dapit sa dakbayan sayo kagahapon sa kaadlawon ug nakit-an ang daghan kaayo nga mga sakyanan nga diha ra nagpasad sa karsada. Ang mga sakyanan naglakip sa mga pribado ug pasaheroan kang kansang mga tag-iya wala’y mga grahean sa ilang mga units.

Usa ka mayor sa habagatang lungsod sa Sugbo nanag-iya og daghan kaayong mga sakyanan nga ang grahe anaa sa eskena V. Rama Avenue ug P. del Rosario Extention apan ang uban sa iyang sakyanan dili na maarang sa iyang grahean mao nga anaa ra sa karsada. (BANAT NEWS)